Sqaron gafën/ Jenishehri: Më bëni ministër, për 3 muaj vendos rendin

Selami Jenishehri, kryetari i Partisë së Pensionistëve, njëkohësisht deputet i Kuvendit të Shqipërisë, që ka votuar pro shkarkimit të Ilir Metës si President, ishte i ftuar në emisionin “Të Paekspozuarit” në MCN TV, ku dha disa sqarime shumë të nevojshme, lidhur me performancën e tij në Parlament.

Jenishehri deklaroi pak ditë më parë se do të luftojë “për nipërit dhe mbesat pensionistë”, gafë për të cilën u vu në lojë.

Por, sot ai ka dhënë një shpjegim, se çfarë kishte parasysh me këtë zotim për të luftuar për nipërit pensionistë. Jenishehri tha se ka pensionistë shqiptarë, që janë aq të vjetër, sa edhe nipërit i kanë pensionistë: “Unë jam 80 vjeç. Ka pensionistë edhe më të rinj, por ka pensionistë që kanë nipa dhe mbesa, që janë pensionista. Këta nuk kanë mend, të kapin gabim kot. Pensionistat kanë nipat dhe mbesa, që janë 65 vjeç. T’u dalim zot atyre.”

Më tej ai tha: Unë eci në rrugë me biçikletë, se më bën mirë të mbaj trupin edhe biçikleta ecën njëlloj si vetura. Këta zgërdhihen, janë budallenj. Unë kursej xhepin, shëndetin. Këta qeshin, deputeti me biçikletë. Se sipas këtyre duhet të jem me fuoristradë. Më solli ‘Fiks Fare’, një që donte të bëhej kandidate. Këta më filmuan, më përgjuan, për të më prishur imazhin, sepse e kanë frikë partinë time”.

Në shtator mbyllet legjislatura aktuale, ndërsa Selami Jenishehri ishte interesuar për pensionin dhe bonusin: “Unë nuk i di me saktësi, por mesa kam dëgjuar, që interesohen kolegët e mi, por ne më 8 shtator do të na fusin në xhep tre rroga deputeti, dy vjet rrogën e deputetit, 1.2 milionë lekë”.

Drejtuesi i emisionit u ndal edhe te krimi në Shkodër, duke qenë se Jenishehri përfaqëson këtë qark. “Një nga kolegët e mi gazetar, i rëndësishëm, më shkruan, ‘shiko, ky njeri duket kaq i rëndësishëm sa mund të ndalojë edhe krimin në Shkodër. Mund ta ndryshosh situatën?” e pyeti Rakipi.

Deputeti premtoi që nëse Edi Rama i beson ministrinë e Brendshme për tre muaj vendos rendin: “Ban me më thanë sot Edi Rama, du me të bë ministër, zgjidh cilën ministri, a e di cilën kërkoj? Rendin, të Brendshmen. A e di çfarë i bëj? Me e mbajt mend Shqipëria. Për tre muaj vendos rendin, me u dridh i gjithë shteti”.

Share With:
No Comments

Sorry, the comment form is closed at this time.