Sfida e re në TikTok po shfrytëzohet nga disa njerëz

Sfidat në TikTok janë të ndryshme por jo gjithmonë janë të preferuara nga të gjithë sepse disa mund të jenë argëtuese, të tjerat pa kuptim.

Sidoqoftë, shumica e tyre janë të padëmshme, por ka edhe raste kur një trend mund të marrë një kthesë të errët. Për shembull kur në këto sfida përfshihen ekspertë të cilët kanë njohuri teknike dhe gatishmëri për të përfituar nga pafajësia e disa përdoruesve të mediave sociale.

Sipas “New York Post”, ditët e fundit janë bërë virale disa mesazhe nga gratë që paralajmërojnë përdoruesit e tjerë të platformës të qëndrojnë larg trendit të diskutueshëm, pasi disa e përdorin atë për të parë “trupat e tyre” të zhveshur.

Sipas artikullit, një person, me pak ose pa rroba, përdor një filtër të kuq për të mbuluar lakuriqësinë e tij dhe kërcen në mënyrë joshëse nën tingullin e një kënge dashurie. Rezultati është një klip seksi, por që nuk tregon shumë, pasi filtri në thelb mbulon trupin.

Problemi është se disa përdorues të mediave sociale kanë gjetur një mënyrë për të hequr filtrin, duke ekspozuar në thelb trupat e zhveshur ose gjysmë të zhveshur të njerëzve që i postojnë ato, sipas një postimi në “Buzzfeed”.

Ata madje arritën në pikën sa të tregojnë udhëzime në YouTube se si të eliminojnë dritën e kuqe për të shijuar spektaklin pa pengesa. Në një mesazh tjetër paralajmërues, një tjetër përdorues i TikTok u tregon atyre që dëshirojnë të marrin pjesë në sfidë të kenë kujdes se çfarë veshin përpara se të postojnë videon.

Për fat të mirë, disa femra duket se janë ndërgjegjësuar.