‘Tradhtia’/ Dumani: Avokati, 120 mijë euro që t’i vrisnim ish-gruan

Në dëshminë e gjatë që Nuredin Dumani ka dhënë para SPAK ndodhet dhe ajo për avokatin e shpallur në kërkim, Alban Bengasi.

Sipas të penduarit Dumani, avokati, i cili punonte për llogari të bandave, u kërkoi t’i vrisnin ish-gruan. Ai u ka ofruar 120 mijë euro, pasi donte të hakmerrej, pasi ajo e kishte tradhtuar me shokun e tij të ngushtë.

Dumani tregon se fillimisht Bengasi kishte kërkuar që ish-gruaja e tij të dhunohej dhe t’i shkaktoheshin dëme të shumta.

Por këtë “punë” Dumani thotë se nuk e pranoi ta bënte vetë, pasi nuk i pëlqente të rrihte gra, prandaj këtë porosi ua kaloi Eljo Bitrit dhe një djali tjetër për të cilin thotë se nuk i kujtohet kush ishte.

Pasi e kishin ndjekur për ditë me radhë Blerta Bengasi (Ruçin), Eljo Bitri e qëllon atë me grushte në fytyrë derisa i del gjak.

Pas kryerjes së porosisë, Dumani takon avokatin për t’i marrë paratë, por ky i fundit ishte i pakënaqur, pasi ajo nuk kishte thyer as krah dhe as këmbë.

Madje, avokati herën e dytë i kërkon Dumanit që t’i vriste ish-bashkëshorten dhe si këmbim do t’i jepte 120 mijë euro.

Por për Dumanin, kjo ishte një shumë e vogël, pasi bëhej fjalë për vrasjen e një gruaje, dhe Bengasi e ka “kërcënuar”, duke i thënë që nëse s’e merrte ai përsipër do t’ia jepte këtë “punë” Gjergji Cukalit. Për këtë thotë Dumani nuk ka pranuar ta marrë përsipër, madje i ka thënë avokatit që ta bëjë kush të dojë.

Në fund të vitit 2019 ose fillim të vitit 2020 mesa mbaj mend, më kërkon Festim Qoli, por s’e mbaj mend me telefon apo me ndonjë person. Takimin e kemi bërë tek shtëpia e Festimit. Kur kam shkuar tek shtëpia më ka kërkuar ndihmë për një mikun e vet. Ishte avokat. Ky avokat ka qenë edhe avokati im në çështjen që kam pasur për heqje të lirisë së personit në vitin 2013. Mbaj mend që ka pasur një ‘Range Rover’ të fundit me 444. Avokati është qeros, i gjatë, i dobët me emrin Alban. E kam takuar dhe vetë mbrapa për këtë punë që më tha Festimi. Kam shkuar në darkë tek Festimi. Pasi ndenjëm, më kërkoi të rrihnim një femër kundrejt pagesës. Kjo femra jetonte në Tiranë, tek Kodra e Diellit. Ia di dhe pallatin nëse shkoj dhe shikoj. Ajo kishte një ‘Fiat punto’ ngjyrë vishnje me sa mbaj mend unë dhe targat mund të kenë qenë 020DI, por s’jam i sigurt për këtë gjë. Festimi më tha sa lekë doja që ta bëja si punë. I thash që nuk e kam me qejf me e rraf, por do e diskutojmë që t’i çojmë dikë tjetër. Festimi ma kërkoi me ngulm këtë gjë, pasi donte t’ia bënte si nder mikut të tij që kishte avokat. Këtë punë Festimi donte shumë që t’ia realizonte, pasi kur ra tërmeti në nëntor, iu prish kompleksi dhe kërkonte dëmshpërblim nga shteti. Avokati do ta ndihmonte që të merrte 500.000 euro.

Festimi më çoi afër te shtëpia e saj dhe më tha se kush ishte objektivi. Unë e pashë atë ditë dhe e fiksova si pamje. Nga ajo ditë unë e ndoqa disa ditë vetëm për t’i mësuar itinerarin. Më pas e kam ndjekur një ditë me Asllan Plakun por ai nuk ma mbushi mendjen dhe e lashë si punë që të ma bënte ai dhe më pas i thash Eljo Bitrit dhe një djalë tjetër që nuk ja mbaj mend emrin dhe as si pamja nuk e mbaj mend mirë. E kam ndjekur gruan edhe me Eljon dhe atë djalin dhe i tregova ku rri, çfarë bën. Mbaj mend që ajo blinte byreqe në drekë tek një byrektore, një kioskë njëkatëshe afër një shkolle. Ajo rruge ka qenë mbrapa ish-tregut elektrik. Mbaj mend që nga ajo rrugë dilje te një spital dhe më pas tek Teg-u. Ajo merrte çdo ditë byrek aty, ndonjëherë pinte dhe kafe në një lokal, në katin e dytë me disa gra të tjera. Pasi e pa Eljo se ku ishte u sigurua për personin dhe unë ika pastaj. Dua të shtoj se Festimi donte patjetër që t’i thyenim një këmbë ose një dorë. Eljo, mbasi mbaroi punën, më ka shkruar mesazh dhe më pas kemi pirë kafe, duke më thënë që e kreva atë punë. Më tregoi që i kishte rënë me grushta fytyrës, derisa e kishte parë që i ka dalë gjak nga fytyra. Godija ka ndodhur brenda në mjeti. Goditja ka ndodhur përballë byrektores. Unë e prisja gruan që, kur dilte nga shtëpia nuk e mbaj mend orën, dhe e ndiqja deri tek byrektoret në fakt. E ndiqja kudo që shkonte ajo. Doja të dija me imtësi rrugët që bënte, ku shkonte që t’u jepja informacion të plotë çunave. Shkova te Festimi i kërkova lekët por ai nuk ishte i kënaqur, sepse nuk kishim thyer as këmbë, as dorë, por vetëm turinjtë. Festimi në atë moment kishte folur me avokatin. Avokati nuk ishte i kënaqur, sepse nuk ishte arrit kërkesa e tij. Ai donte që gruaja e tij të ishte sa më e dëmtuar.

Avokati pagesën ia dha Festimit dhe i kishte kërkuar që të bënim një takim të tre. Të shkoja dhe unë që të diskutonim që ta eleminonim gruan e tij komplet, pasi nuk donte që ajo të ishte më gjallë. Mesa di unë, avokati nuk donte që gruaja e vet të ishte gjallë, pasi ajo e kishte tradhtuar me një shokun e vet të ngushtë. Duke e ndjekur gruan, unë e pashë në fakt edhe të dashurin që vinte tek shtëpia e saj, te Kodra e Diellit, e kam parë disa herë. Ishte një burrë rreth të 45–50, trup i shëndoshë, i madh. Takimin e bëmë në një lokal në Tiranë. Vendin nuk e mbaj, mend se ishte natë. Isha unë me Festimin dhe më vonë erdhi edhe avokati me një person tjetër që kishte dalë nga burgu, pasi e kishte nxjerrë avokati. Në tavolinë, avokati më shprehu pakënaqësi për punën e pabërë. Më pas më tha ‘më mirë që shkoi kështu, pasi më është shtuar inati dhe dua ta eliminoj fare’. Më ofroi çmimin 120.000 eurove për ta mbaruar si punë. I thashë ‘është shumë pak për një femër’. Më thanë ‘nëse nuk e bën ti, do t’i them Gjergj Cukalit ta bëj. pasi më ka borxh për një nder. e kam nxjerrë nga burgu’. I thashë ‘vazhdo me Gjergjin, unë s’e marr përsipër këtë gjë’. Ndenjëm dhe gjysmë ore tjetër, por nuk e diskutuam më këtë gjë. Ai po na tregonte se për rrahjen mos u bëj merak ti as shokët, pasi po iku për të bërë denoncim ajo unë shefin e komisariatit e kam njeriun tim dhe ndërhyn ai që për këtë ngjarje të mos arrestohet kush. Pastaj ikëm në punën tonë, unë me Festimin në Durrës. Gjatë rrugës, Festimi me tha ‘pse s’e mere atë punë, pasi ai është robi jonë dhe do na bënte shumë ndere punë të tjera’ se ‘do e kishim në dorë atë, pasi ai ka lidhje me gjyqtarë dhe prokurorë. Edhe unë për atë punë e mbaj afër atë’. Ai pinte shumë mall, kokainë. E mbyllëm si muhabet dhe s’e hapëm më”, thuhet në dëshminë e Dumanit.

Share With:
No Comments

Sorry, the comment form is closed at this time.