INTERVISTA/ Vrasja e Rashës, flet ish-kreu i policisë: SHÇBA duhet të hetojë për…

I ftuar në emisionin “Kjo Javë” në “News24” ishte edhe ish kreu i Policisë së Shtetit, Ahmet Prençi.

Ai komentoi vrasjen e 25-vjeçarit Klodian Rasha nga polici Nevaldo Hajdaraj dhe nxori defektet, por edhe gabimet e bëra nga policia, si në gjykimin e ngjarjes, ashtu edhe në komunikatën e shpërndarë për publikun.

Çfarë do të thotë kjo ngjarje?

Ahmet Prençi: Kjo është ngjarje padyshim e rëndë, aq më tepër kur implikohet policia. Çdo punonjësi i shkakton tronditje të thellë se nuk duhet të ndodhë. Ajo ngjarje u menaxhua keq nga policia. Policia duhet të tërhiqej nga veprimet hetimore kur i përfshirë është një polic, në këto raste thirret prokurori me delegim punonjësve të SHÇBA. Këto gjëra nuk u bënë, pati një çoroditje nga policia, që duket si tentativë për të fshehur diçka. Komunikata e vetme që duhet të jepte ishte komunikata e vrasjes, përfshirja e policit dhe faktin që po e heton një prokuror. Këtu u dha komunikata dhe u cilësua si vrasje në kapërcim të mbrojtjes ekstreme. Akuza ishte e paduhura.

Kush i harton komunikatat?

Ahmet Prençi: Vërej që për rastin konkret për veprimet e punonjësve të policisë që kanë nxjerrë komunikatën duhet të hetojë SHÇBA. Titullarët e policisë zakonisht komunikojnë me publikun për të nxjerrë të dhënat.

Mos ishte kjo tentativë për ta manipuluar ngjarjen?

Ahmet Prençi: Unë e sqarova si duhej bërë, e gjithë pjesa tjetër është keqmenaxhim. Duhej institucion tjetër si Prokuroria për ta hetuar ngjarjen, duhej një njeri më i ftohtë që ta hetonte. Kështu shmangeshin edhe deklaratat kontradiktore që u dhanë në 2 apo 3 ditë.