Kosova aplikon zyrtarisht për sigurimin e vaksinës kundër koronavirusit

Ministri i Shëndetësisë, Armend Zemaj këtë të hënë ka bërë me dije se Kosova ka aplikuar për sigurimin e vaksinës kundër koronavirusit në aleancën globale GAVI-COVAX.

Përmes një postimi në rrjetin social “Facebook”, Zemaj shkruan se një aplikim i tillë nuk do të thotë se Kosova nuk do të ndjekë rrugë të tjera.

“Aplikimi zyrtar në GAVI-COVAX nuk do të thotë se Kosova nuk do të shfrytëzojë edhe rrugë të tjera për të siguruar vaksina shtesë, sipas nevojës, përtej shifrës së 20% të vaksinave që do merren falas (apo rreth 360 mijë vaksina) nga COVAX, meqë synimi është që të imunizohen kategoritë më të ekspozuara dhe rrezikuara nga COVID-19”, shkruan Zemaj.

Ai ka thënë se Kosova synon të vaksinojë grupet e popullatës që janë më ekspozuara dhe më të rrezikuara nga koronavirusi, duke përfshirë: stafin shëndetësor, të moshuarit, personat me sëmundje kronike, personelin e shërbimeve të angazhuara në menaxhimin e situatës epidemiologjike lidhur me COVID-19, dhe më pas edhe kategori tjera.

Programi ndërkombëtar i njohur si COVAX, udhëhiqet nga Organizata Botërore e Shëndetësisë (OBSH), Koalicioni për Inovacionet e Përgatitjes Epidemike (CEPI) dhe Gavi (Aleanca Globale për Vaksinat dhe Imunizimin).

Ky program synon të bashkojë fondet e shteteve të pasura dhe të organizatave joqeveritare, me qëllim të zhvillimit të vaksinës për sëmundjen COVID-19, që shkakton koroanvirusi, si dhe ta shpërndajë atë në gjithë botën. Përmes këtij program, Kosova planifikon të sigurojë 1.2 milionë vaksina.

Maqedonia Veriore veç ka bërë porosinë prej 800 mijë vaksinave, Serbia ka siguruar 1.8 milion doza, dhe Bosnje e Hercegovina ka porositur mbi 1.2 milionë vaksina. Për Shqipërinë ende nuk ka të dhëna, por edhe ky shtet synon të sigurojë vaksinën përmes programit COVAX.