Denaj, biznesit shqiptar në Greqi: Shtoni investimet në Shqipëri

Ministrja e Financave dhe Ekonomisë, Anila Denaj, mori pjesë në një takim online me anëtarët e Dhomës së Tregtarëve të Athinës, ku ishte i pranishëm dhe ministri i Disporës, Pandeli Majko, ai i Zhvillimit dhe Investimeve, Adonis Georgiadis dhe Presidenti i Dhomës së Tregtisë së Athinës (E.E.A) Janis Chatzitheodosiou.

Ministrja Denaj vlerësoi punën e tyre si sipërmarrës dhe angazhimin e vazhdueshëm me vendin e origjinës dhe me ndikim të drejtpërdrejtë në shtëpinë e tyre të sotme.

“Në kushtet ku ndodhemi, diskutimet mbi ecurinë e bizneseve shqiptare në Shqipëri dhe jashtë territorit të vendit janë me një rëndësi të vecantë për ekonominë, sidomos për programet e rimëkëmbjes ekonomike pas pandemisë”, tha Denaj, duke i konsideruar sipërmarrësit shqiptarë në Greqi një faktor të rëndësishëm në të dy anët e kufirit dhe faktor kyç i bashkëpunimit ekonomik e tregtar ndërmjet Shqipërisë dhe Greqisë.

Denaj tha se qeveria shqiptare “mirëpret çdo investim që buron nga ju si sipërmarrës, përfaqësues dhe kolegë të sipërmarrjes greke në Shqipëri”.