CPJ: Qeveritë shtypën mediat në kohën e COVID-19/ Numër rekord i gazetarëve të burgosur

Një numër rekord gazetarësh u burgosën në vitin 2020, sipas Komitetit për Mbrojtjen e gazetarëve (CPJ), që akuzon qeveritë e mbarë botës për shtypje të medias dhe nxitjen e dezinformimit në kohën e pandemisë COVID-19.

Sipas raportit vjetor të CPJ, 274 gazetarë janë burgosur dhe 26 gazetarë dhe punonjës mediatikë janë vrarë gjatë vitit të kaluar. “Është tronditëse dhe e tmerrshme”, theksoi drejtori ekzekutiv i CPJ-së, Joel Simon në një komunikatë.

Vendi që ka burgosur më shumë gazetarë është Kina, për të dytin vit radhazi, sipas CPJ-së, me 47 gazetarë pas hekurave.

Turqia, Egjipti dhe Arabia Saudite, përkrah Bjellorusisë dhe Etiopisë bëjnë pjesë gjithashtu mes vendeve që kanë burgosur më shumë gazetarë.