COVID-19/ OBSH jep lajmin fantastik… edhe për Shqipërinë

COVAX, një iniciativë ndërkombëtare mes 190 shteteve (ku është dhe Shqipëria), që kërkon të sigurojë se të gjitha vendet do t’i marrin në mënyrë të barabartë vaksinat kundër koronavirusit, po planifikon të fillojë shpërndarjen e tyre në tremujorin e parë të vitit 2021.

Deri në mes të vitit që vjen, aleanca COVAX do të ketë dhënë mjaftueshëm doza për të mbrojtur punonjësit e kujdesit shëndetësor dhe social në të gjitha vendet pjesëmarrëse, që kanë kërkuar t’i marrin vaksinat në këtë afat kohor.

Të gjithë pjesëmarrësit e tjerë duhet të marrin doza të mjaftueshme për të mbuluar 20 për qind të popullsisë së tyre, deri në fund të vitit 2021 dhe doza të tjera një vit më pas.

“COVAX ka marrëveshje për të marrë gati 2 miliardë doza vaksinash nga disa kandidate dhe ka hedhur hapat e para për të siguruar doza të mëtejshme përmes kontributeve nga donatorët. Ky është një lajm fantastik dhe një moment historik në shëndetin global. Kjo është një kohë për t’u ngushëlluar se tashmë po shohim më qartë fundin e pandemisë, por duke u kujdesur që të mos e ulim vigjilencën. Ne të gjithë jemi përgjegjës për marrjen e masave për të mbajtur veten dhe njëri-tjetrin, përfshirë edhe në këtë sezon festash. Me lajmet e sotme drita në fund të tunelit është rritur pak më shumë, por ne nuk kemi arritur akoma në fund të tunelit. Dhe do të shkojmë atje vetëm nëse punojmë bashkë.”, tha Drejtori i Përgjithshëm i OBSH-së, Tedros Adhanom Ghebreyesus, në një konferencë online.