COVAX siguron vaksinën për 190 vende. Furnizimi global nis më 2021

COVAX, iniciativa globale për sigurimin e vaksinës anti-Covid për të gjitha vendet, pavarësisht të ardhurave, njoftoi sot se ka arritur marrëveshje për rreth 2 miliardë doza, në emër të 190 vendeve.

Për shumicën dërrmuese të këtyre marrëveshjeve, COVAX ka akses të garantuar në një pjesë të valës së parë të prodhimit, që do të ndiqet nga furnizim në vëllim më të madh sapo të jenë gati.

Marrëveshja e njoftuar sot do të bëjë të mundur që të gjitha vendet pjesëmarrëse të kenë akses në dozat e vaksinimit në gjysmën e parë të vitit 2021, me furnizimet e para në çerekun e parë të vitit, kontingjent që do të varet edhe nga gatishmëria e vendeve për të pritur furnizimin me vaksina.

Doza me vlerë të paktën 1.3 miliardë dollarë të financuara nga donatorë do të jenë në dispozicion të 92 ekonomive, me objektiv 20% të popullsisë, brenda fundit të këtij vitit.

Marrëveshjet e njoftuara sot përfshijnë nënshkrimin e blerjeve të avancuara nga “AstraZeneca” për 170 milionë doza dhe një memorandum mirëkuptimi me “Johnson & Johnson” për 500 milionë doza të vaksinës Janssen, e cila aktualisht po shqyrtohet si vaksinë që jepet në një dozë të vetme.

Këto marrëveshje vijnë pas atyre ekzistuese që COVAX ka me Serum Institute të Indisë (SII) për 200 milionë doza, me opsionin për 900 milionë të tjera, me “AstraZeneca” për vaksinat Oxford apo Novavax, si dhe për 200 milionë doza të vaksinës GSK nga Sanofi.