Tensionet/ Kurti: Vuçiq e Petkoviq janë përgjegjës

Nesër (e hënë) hyn në fuqi vendosja e reciprocitetit me Serbinë për një sërë marrëveshjesh.

Por kjo ka provokuar tensione të përshkallëzuara në veri të Kosovës.

Disa qytetarë serbë, ndër ta edhe persona të maskuar, kanë bllokuar rrugët.

Lidhur me situatën, kryeministri i Kosovës, Albin Kurti, ka reaguar dhe fajësuar direkt Vuçiqin dhe Petkoviqin.

Sipas tij, Qeveria e Kosovës dhe i gjithë shteti janë në gatishmëri të plotë, pasi situata në orët në vijim mund të përkeqësohet edhe më tej.

Postimi i plotë i Kurtit

Të dashur qytetarë të Republikës së Kosovës,

Ende pa filluar lëshimi ynë i dokumenteve të hyrje-daljeve në vendkalimet kufitare me Serbinë, strukturat ilegale serbe në veri filluan me bllokim rrugësh dhe të shtëna armësh. Atyre ju paraprinë deklaratat, takimet dhe mbledhjet e frikës dhe kërcënimit në Beograd dhe në Rashkë. Aty u planifikuan dhe u nxitën këto veprime agresive që po ndodhin sot. Vuçiq dhe Petkoviq janë përgjegjësit kryesorë për trazirat.

Qeveria e Republikës së Kosovës është demokratike e progresiste, që e don, respekton dhe zbaton ligjin dhe kushtetushmërinë, paqen dhe sigurinë, për të gjithë qytetarët pa dallim dhe për mbarë vendin tonë të përbashkët. Organet e rendit dhe të sigurisë së shtetit tonë po mbledhin informacion, po mbikëqyrin gjendjen dhe do të veprojnë, në mbrojtje të ligjit dhe të qytetarëve, të sovranitetit dhe integritetit tonë territorial.

Përcjellni me vëmendje njoftimet nga qeveria jonë, nga Ministria e Punëve të Brendshme dhe Policia e Kosovës, dhe, mos lejoni të dezinformoheni nga mediet e Beogradit zyrtar apo edhe ndonjë medie në Kosovë që me vetëdije u shërben atyre apo pa vetëdije bie pre e tyre.

Orët e ditët e javët në vijim mund të jenë sfiduese e problematike. Po përballemi me nacional-shovinizmin serbomadh që e njohim mirë. Do të punojmë ditë e natë, do të jemi në krye të detyrës, për juve si qytetarë dhe për Republikën tonë demokratike. Dhe, së bashku arrijmë të ngadhënjejë rendi e ligji duke i vendosur ato në çdo cep të vendit.

Ju faleminderit për mbështetjen.

Share With:
No Comments

Sorry, the comment form is closed at this time.