Problemet e profesioneve të rregulluara/ Kushi: E gatshme për bashkëpunim

Ministrja e Arsimit, Sportit dhe Rinisë, Evis Kushi, ka zhvilluar një takim me Presidentët e Urdhrave të Profesioneve të Rregulluara. 

Sipas saj, ka qenë një takim i frytshëm dhe se u ka garantuar atyre gjithë gatishmërinë e saj për të pasur një bashkëpunim sa më të ngushtë për adresimin e çështjeve që prekin punën e përbashkët.

“Shqipëria është në një fazë të rëndësishme në rrugëtimin e saj drejt Bashkimit Evropian, ku një pjesë jo e vogël e ndryshimeve ligjore përfshin edhe profesionet e rregulluara. Në këtë kontekst, bashkëpunimi ynë do të jetë një mundësi më e mirë për të pasur një kuadër ligjor konform legjislacionit të BE-së dhe për të rritur gjithashtu cilësinë e profesionistëve tanë”, tha Kushi.

Sakaq, ajo nënvizon edhe rëndësinë që kanë profesionistët më të mirë-arsimuar: “Profesionistët më të mirë-arsimuar do të sjellin pa diskutim jo vetëm përmbushje të standardeve evropiane, por njëkohësisht edhe përmirësim të ofrimit të shërbimeve ndaj qytetarëve”.