Mbi 4 mijë pushues, shërbim falas në qendrat shëndetësore verore

Mbi 4 mijë pushues kanë marrë shërbim falas, në kohë e me cilësi, në qendrat shëndetësore të hapura posaçërisht për shëndetin dhe sigurinë e qytetarëve përgjatë sezonit turistik.

Ministrja e Shëndetësisë dhe Mbrojtjes Sociale, Ogerta Manastirliu vlerësoi sot profesionalizmin e ekipeve mjekësore në këto qendra që po i shërbejnë pushuesve dhe turistëve të huaj.

“Jam shumë krenare për ekipin energjik të qendrave shëndetësore verore, që po i shërbejnë me shumë përkushtim e profesionalizëm pushuesve dhe turistëve të shumtë në këto ditë të nxehta korriku. Mbi 4 mijë pushues kanë marrë shërbim falas, në kohë e me cilësi”, tha ministrja.

Manastirliu shtoi se “nga veriu në jug janë në gatishmëri super stafet e 29 qendrave shëndetësore verore, të hapura enkas për një sezon turistik të sigurt e të shëndetshëm”.