FONDI/ Furnizimi me ujë të pijshëm, BEI “hap qesen” për Bashkinë e Tiranës

Përmirësimi i bilancit, falë menaxhimit të mirë dhe eliminimit të humbjeve, duket se e ka kthyer Bashkinë e Tiranës në një partner të besueshëm për institucionet financiare ndërkombëtare.

Pas BERZH, së fundmi, edhe Banka Evropiane për Investim (BEI) i ka akorduar Bashkisë së Tiranës 80 milionë euro që do të përdoren për përmirësimin e furnizimit me ujë të pijshëm në kryeqytet.

Projekti do të kontribuojë në efikasitetin e burimeve natyrore, duke siguruar një furnizim të vazhdueshëm e të sigurt me ujë në kryeqytetin e Shqipërisë, si dhe duke zvogëluar edhe konsumin e energjisë.

Në faqen e saj, BEI thekson se, falë këtij projekti të Bashkisë së Tiranës, do të ketë një ndikim pozitiv në rritjen ekonomike dhe në punësim gjatë fazës së realizimit të tij.