Drafti i ri i Kodit Penal: 1 vit burg kush bën “meme” pa leje

Drafti i ri i Kodit Penal ka kaluar për shqyrtim nga Ministria e Drejtësisë tek Komisionet Parlamentare me një propozim që ndalon montazhin e pamjeve të një personi pa pëlqimin e tij, ose siç njihen ndryshe në të gjithë botën “meme”. Ky projekt, i hartuar nga Ministria e Drejtësisë, parashikon dënimin me burg deri në 1 vit burg të kujtdo që realizon këto montime.

Konkretisht në nenin 238 të ligjit thuhet se:

1. Publikimi në çdo formë, mënyrë apo mjet i një montazhi të realizuar me fjalët ose imazhin e një personi pa pëlqimin e tij, nëse kryhet për qëllime përfitimi material ose jo material, apo kur ka qëllim të dëmtojë reputacionin e një personi, kur materiali nuk shfaqet dukshëm që është një montazh ose nëse nuk përmendet shprehimisht se eshtë i tillë, përbën kundrvajtje penale dhe dënohet me burgim deri në 1 vit.
2. Ndjekja penale fillon me ankim të viktimës ose përfaqësuesit ligjor të saj dhe pushon me tërheqjen prej saj.

Megjithatë, nga drafti deri tek miratimi final, ka ende rrugë.