Dëshmia e plotë/ Si nisi përplasja mes miqve Dumani-Çela

Nuredin Dumani prapa hekurave, ndërsa Talo Çela në kërkim nga policia. Bëhet fjalë për dy nga njerëzit që kanë kryer vrasje dhe terror në qytetin e Elbasanit, Durrësit, Tiranës dhe jo vetëm.

Por historia e tyre e miqësisë, pasi disa “punësh” të bëra bashkë, u kris në vitin 2019, kur Dumani doli nga burgu.

Në dosjen e siguruar është zbardhur dëshmia e Nuredin Dumanit, i cili tregon shkakun pse ai dhe Talo Çela – dikur miq – u kthyen në armiq të betuar, çka solli dhe ekzekutimin e Bujar Çelës, vëllait të Talos.

Dumani tregon se gjithçka nisi për një makinë.

Sipas tij, “Benzi” i tij që e kishte dhuratë ishte përdorur në vrasjen e Andi Zylyfit.

Ai thotë se këtë makinë kishte në plan ta përdorte në raste të tjera, por Talo e kishte marrë dhe sëbashku me Miri Haxhinë, Altin Nocin dhe Tos Gosën kryen vrasjen e Andi Zylyfit.

Dumani ka treguar se i kishte kërkuar Talos të merrte pjesë edhe ai në vrasje, sepse sapo kishte dalë nga burgu dhe i duheshin lekë, por Talo i kishte thënë se tashmë kaparin për këtë “punë” e kishin marrë Miri Haxhia dhe Altin Noci. Por i kishte premtuar se do t’i zëvendësonte makinën dhe se do t’i jepte parà, gjë që nuk ndodhi.

Më tej, ai tregon se ishte sharë dhe ofenduar disa herë me Talo Çelën në telefon, madje njëherë një nga njerëzit e Çelës i ka dalë përpara vëllait të Dumanit dhe ka shtënë me pistoletë, por arma nuk ka nxjerrë plumb.

Kjo bëri që më pas situata mes dy miqve të dikurshëm të agravohej edhe më shumë, edhe pse vazhdimisht Talo Çela bënte përgjegjës Tos Gosën.

“Në vitin 2019, pasi kam dalë nga burgu më ndodhi një konflikt me Talo Çelën. Pas vrasjes së Andi Zylyfit e ndjeva veten të përdorur për arsye se ‘Benzi’ që u përdor në ngjarjen e vrasjes mua ma kishin falur. Unë po e mbaja që ta shfrytëzoja për ndonjë ngjarje tjetër, grabitje ose vrasje. Ata ma kërkuan duke më thënë që u duhej shpejt, pasi do kryenin vrasjen e Andi Zylyfit. Makina ishte ‘Mercedez Benz’ E ose ‘C Clas’, ngjyrë gri, të cilën e kam patur tek garazhi i Gim Gjinit. Kjo makinë ka ndryshuar ngjyrë tre herë: nga e bardhë, e zezë dhe gri, tek servisi i Dorjan Shkozës, në zonën e Nishtullës. Unë vetë i kërkova Talos të merrja pjesë, pasi kisha mbetur pa lekë, por ai më tha nuk të fus dot se është në pjesë Miri Haxhia dhe Altin Ndoci. Ata kanë marrë kaparin. Talo më tha që do të ma zëvendësonte makinën, pasi të mbaronte ngjarja. Makinën nuk ma zëvendësoi dhe nuk më dha as lekët që më premtoi. Disa ditë më vonë pas ngjarjes po debatoja me Talo Çelën se ngjarja kishte ndodhur në Peqin dhe ato kishin ardhur në Durrës për kontroll te shtëpia ime. Thirrën dhe vëllain e madh po ska lidhje. Fajin Talo ia vinte Tos Gosës, sepse ky ishte informator i lëvizjes së Andi Zylyfit. Tos Gosa është bashkëpunëtor tek të gjitha vrasjet që kanë ndodhur në Elbasan, duke filluar nga Indrit Dylgjeri, 2 vëllezërit Baho dhe tek Andi Zylyfi. Tosi është diku mbi 40 vjeç, ka një lokal ose restorant në Peqin, ka pasur një ‘Golf’ të zi dhe një BMV seria 3. Tosi është kuqalosh, diku tek 175cm. Këtë ua them me siguri, pasi e kam takuar dhe vetë Tosin. Pasi i është bërë atentati Andi Zylyfit kam shkuar me urdhër të Talos tek Dine Çami, i cili ka një lokal diku në qendër të Elbasanit. Ka fast food. Kam shkuar tek Dine Çami, kam marrë një qese të zezë me lekë, të ndara në dy pjesë. Unë Dine Çamin nuk e kisha parë më parë, por kisha dëgjuar për të. Në dijeninë time, Dine Çamit lekët për vrasjen e Andi Zylyfit ia ka dhënë Kel Kamami. Dine Çami është burri i tezes së Kel Kamamit. Dine ka patur lidhje familjare me Kelin. Nëpërmjet tij ka krijuar kontakt dhe me grupin e Çopajve (vëllezërit Çopja) dhe kjo i ka mundësuar Dines të investojë shuma parash të marra prej tyre në biznese të ndryshme. Dine ka një lokal, fast food dhe një servis. Ka shumë prona që janë investime të Çopajve. Dine Çami është trup i shkurtër, i shëndoshë dhe qeros. Talo më tha do marrësh disa lekë, ato të voglat ndarjen me të vogël do ia japësh Tos Gosës. Tos Gosën e kam takuar tek pishat në Peqin, mesa mbaj mend. Ka patur një makinë të vogël, por s’e mbaj mend. Kemi biseduar pak dhe i kam thënë ‘ja ku e ke porosinë tënde’. Pjesën tjetër ia kam dhënë Altin Ndocit, i cili ka ardhur tek rrugica e lagjes time. Altini ka ardhur më një ‘C Class’ 2008/2009. Mbaj mend që ka qenë aksham kur i kam dhënë lekët. Altinin e pyeta për pjesën time, ai më tha për këtë punë merret Lala (Talo Çela). Konflikti vazhdoi më Talon edhe në telefon, edhe ballë për ballë. Ai për çdo gjë me sillte Altin Ndocin për të biseduar, ndërkohë kishte lidhje me Dorjan Shkozën. Një ditë kam sharë/ofenduar Altinin te lagjja. Dorjani nuk më la ta godisja Altinin. Unë isha me vëllain tim, Dashnorin. Pas 2 ose 3 ditësh Altin Ndoci i ka dalë vëllait tim Dashit e ka ndaluar në rrugë, vëllai ka qenë me BMV seria 3, Altini i ka nxjerr pistoletën me mulli vëllait siç duket ka shkrep armën por nuk ka realizuar qitjen. Në atë moment vëllai del dhe e rreh keq Altinin në afërsi të lagjes time. Vëllai më vuri në dijeni për ngjarjen. Unë i shkruajta Talos dhe e shava goxha rëndë dhe i thash tani e tutje keni punë me mua pas kësaj ngjarje. Talo më tha që nuk e kam bërë s`kam çuar njeri dhe vëllait tënd i blej dhe makinë të re. Altin Ndoci na provokonte goxha herë bashkë me Mirin e Kolës, saqë nuk po dinim të reagonim në atë kohë. Pashë situatën që nuk ishte e mirë, Dorjan Shkoza ishte gjatë gjithë kohës pas meje në çdo lëvizje duke më vëzhguar. Më pas u ula me vëllain dhe i thashë që duhet të largohemi nga Shqipëria pasi ato duan të na vrasin, unë nuk lëvizja dot pasi isha me ekspuls…….”, thuhet në dëshminë e Dumanit.

Share With:
No Comments

Sorry, the comment form is closed at this time.